سخر الإعلامي أحمد شوبير من تصريحات هشام نصر نائب رئيس نادي الزمالك، والتي طالب فيها الرئيس عبد الفتاح السيسي بالتدخل لدعم الأندية الجماهيرية.
مؤكدًا أن الأندية التي تعاني ماليًا، يجب أن تراجع أداءها بدلًا من الاعتماد على الدولة.
أحمد شوبير لإدارة الزمالك: الدولة مش هتديك فلوس تجيب لاعبين
وفي تصريحات إذاعية، علّق شوبير قائلًا: من الحاجات اللي بتجنني، لما تلاقي حد ناجح ييجي حد تاني يسأله أنت ناجح ليه، بتجيب فلوس إزاي، بطولات إزاي، طب يعني أنت عايزني أفشل.
وأضاف: أنا بشتغل، بجيب بطولات، فبكسب، فبحقق دخل، في المقابل ناس تانية ما بتشتغلش وبتفلس، وبعدين تروح تقول للدولة إديني فلوس.
أوضح شوبير أن الدعم الحكومي له حدود منطقية، متابعًا: الدولة مش هتديك فلوس عشان تشتري لاعبين، ممكن توفرلك أرض أو تسهيلات تساعدك تعمل فرع وتجيب عضويات، لكن مش هتدعمك بالمليارات عشان تجيب صفقات.
أحمد شوبير: الدولة دعمت الزمالك بأرض أكتوبر
وواصل أحمد شوبير حديثه منتقدًا فكرة مقارنة أداء الأندية ببعضها: بدل ما نقول برافو على الأندية اللي بتشتغل صح، نقول نحقق في مصدر دخلها! طب شوف نفسك الأول، ليه بتخسر، أصلح أخطاءك بدل ما تناشد الرئيس.
وهاجم شوبير بشدة فكرة أن يكون النادي الناجح مطالبًا بالتوقف عن التميز، لمجرد أن آخرين لا يحققون نفس النتائج.
قائلًا: يا نهار أبيض يعني لازم النادي اللي بيكسب يخسر، عشان يبقى زي غيره؟! طب ما تشتغل، شوف ليه بتخسر وحاول تعالج ده.
اقرأ أيضا :ترتيب هدافي الدوري الإسباني..صراع مشتعل بين الكبار
وتابع: الأهلي مثلًا، لما خسر بطولات في الصالات، شاف الأسباب واشتغل وعمل إصلاحات، ورجع حقق بطولات، ذاكر تنجح، مش هتذاكر مش هتنجح.
وختم شوبير تصريحاته برسالة صريحة: أي حد عنده نقد أو طلب، يتكلم بورقة وقلم وبأرقام، مش بالكلام المرسل. لازم نغير الفكر، لأن طول ما في شكاوى بدون شغل، مفيش نجاح.
اقرأ أيضا :موقف وسام أبوعلي من مباراة العودة أمام صن داونز
